[the_ad_group id=”107″]

የጠያራ እገዳ ስለመጠየቅ

መንግሥትና ክፉ ተጠቃሚዎች የሚያበሩት ጠያራ የበረር እገዳ እንዲደረግበት ስለመጠየቅ!

በቅርቡ በመገናኛ ብዙኀን የደረሰን ማሳሰቢያ እንዲህ ይላል፦ “የቦይንግ 737 የቡሾፍቱው አደጋ በሙሉ ቁመናው በውበት ያለ የሰው ልጅ በስድስት ደቂቃ የማንነቱ ደብዛ ጠፍቶ የአንድ ፌስታል የዐፈር ልውስ እንደሚሆን ያስተምረናል፤ እባካችሁ አደብ ገዝተን እርስ በርስ እንቻቻል።” ልክ ነው፤ እናድብ! አደጋው ብሔራዊ ብቻ ሳይሆን፣ ዓለም አቀፋዊ የልብ ስብራት ማስከተሉና በቀላል የማይረሳ አሰቃቂ መሆኑ ምንም አያጠያይቅም። ይሁን እንጂ ትምህርት ሳንወስድባቸው ያለፍናቸው አእላፋት ድርጊቶች ያሉን ሕዝቦች በመሆናችን በርግጥ የተባለውን ትምህርት ከዚህ እንወስድበታለን ወይ? ብዬ ለመጠየቅ እገደዳለሁ።

በመጀመሪያ ደረጃ፤ ሌሎች አገሮች ከዚህ አደጋ በመነሣት የወሰዱት ፈጣን ትምህርትና ርምጃ ምንድን ነው? ተሳፋሪዎች ሁሉ ሟቾች እንደ ሆኑ ማሳሰብ ሳይሆን፣ አስቸኳይ ትምህርታቸው አንድና አንድ ብቻ ነው! ይህ አውሮፕላን (ጠያራ) ከማድረስ ይልቅ በየስፍራው መከስከስ ስላበዛ ብቸኛው መፍትሔ ከመሬት እንዳይነሣ ማድረግ ነው! እንደውም አንዳንድ አገሮች አውሮፕላኑን የሸጡላቸውን አገሮች ለመክሰስ እየተዛጋጁ ነው።

እኔ በቅርቡ ዓመታት ኢትዮጵያን ለተደጋጋሚ መከስከስ የዳረጋት ሌላ ከይሲ ጠያራ ከበረራ እንዲታገድ፣ ከዚህም በፊት እንደጠየቅሁት ሁሉ አሁንም ከሚሊዮኖች ጋር ሆኜ በምሬትና በመንገፍገፍ ይታገድልን ብዬ እጠይቃለሁ!

በአሁኑ ሰዓት በየጥጋጥጉ ኢትዮጵያን እንደ አገር እየከሰከሳት ያለ በረራ “የብሔር ፌደራሊዝም” የተባለው ከይሲ ጠያራ ነው። በሱማሌ ክልል በርካታ የኦሮሞ ብሔረ ሰብ ይዞ ሲበርር ተከስክሷል፤ በአዲስ አበባም ዙሪያ በለገጣፎ አካባቢ በርካታ ነዋሪዎችን ከስክሶ አሁንም በሌሎች የከተማው አካባቢ በረራ ላይ ይገኛል። ከዚህ በፊት በቤንሻንጕል ጉሙዝ ክልል በርካታ አማራዎችን ይዞ ሲበርር በመከስከሱ፣ የፈሰሰው እንባ በአካባቢው የግፍ ፍሬ ያበቅላል ተብሎ ያሰጋል። ይህ ጠያራ በቅርቡ በደቡብ ብሔር ብሔረ ሰቦች በርካታ የጌዲኦ ሕዝብ ይዞ ተከስክሷል። በአደጋው የተጠቁትን ሕዝቦች ዐፈር ለብሰው ማየት እንጀራ ቆርሶ መጎረስ ግፍ እንዲመስለን ሁሉ እያደረገን ነው።

አየር መንገዱ ግን እስከ አሁን ድረስ በረራውን ባለማገድ በየአካባቢው ያሉ ተሳፋሪዎችን ጭኖ እንዲበርር እያደረገ ነው። ይሁን እንጂ ይህ ጠያራ በበረረባቸው አገሮች በሙሉ የከሰክከሳቸው በሚሊዮኖች የሚቆጠሩ ነፍሳት ከሞት ባሻገር ካሉት ሁለት ዓለማት “ትውልድ ይዳን በእኛ ይብቃ” እያሉ እየጮኹ ነው። የዚህ በረራ ባለቤት የሆነ የኢትዮጵያ መንግሥትም ሆነ በረራውን ደጋፊ ሕዝብ 150 ሰው ሳይሆን 100 ሚሊዮን ሰው በፌስታል ሳይገባ ባስቸኳይ የብሔር ፓለቲካ/ፌደራሊዝም የተባለውን ጢያራ በአየር እንዳይበርር፣ በምድርም እንዳይሸከረከር የእገዳ አዋጅ እንዲያወጣልን፣ ከተቻለም በየመድረሻችን የሚያደርሰን ጠያራ እንዲያዘጋጅልን፣ በመፍራትና በመርበድበድ በተደጋጋሚ መከስከስ የተጎዳን ሕዝቦች እንጠይቃለን!

ማንንም ሕዝብ በሰላም አድርሶ የማያውቀው – የብሔር ፌደራሊዝም ከበረራ ይታገድ!

Solomon Tilahun

ማንነት እና ስንክሳሩ

“አብሮነት ራሱን የቻለ ድብለቅ ነው፤ ራስ በራስ ሳይሆን እርስ በርስ። ስለዚህ የስሜት ብስለት ይጠይቃል፤ ግለ ሰቦች በስሜት በሳል ሲሆኑ የራስም ሆነ ከሌላው ጋር የሚኖራቸው ትምምን ከፍ ይላል” ሰሎሞን ጥላሁን በአዲስ አድማስ ጋዜጣ ላይ ካሰፈረው

ተጨማሪ ያንብቡ

የጸሎት ኀይል ለአእምሮ ተሓድሶና ለውጥ

እግዚአብሔርን ያስደነቀና ያስገረመ ነገር ካለ በርግጥም አስገራሚና አስደማሚ ጕዳይ ነው። የእግዚአብሔር ቃል በኢሳያስ 56፥19 ላይ እንዲህ ይላል፡- “ሰውም እንደሌለ አየ፥ ወደ እርሱ የሚማልድ እንደሌለ ተረዳ ተደነቀም …”፡፡ እግዚአብሔር በምንም የማይገረምና የማይደነቅ አምላክ ነው። ታድያ በሰው ልጆች አለመጸለይና አለመማለድ ስለ ምን ይሆን የተደነቀው? የምር ልብ ብለን ብናየው እርሱን ያስደነቀ ነገር እውነትም ድንቅ ነው። በጸሎት ውስጥ ያለው ኀይል ወሰን የማይገኝለት ነው፤ አምሳያም የሌለው ነው። ፀሓይንና ጨረቃን በስፍራቸው ያቆመና ባህርን ከፍሎ እንደ ግድግዳ ያቆመ ኀይል ከጸሎት ውጪ ከየት ሊያገኝ ይችላል? ሙታንን ማስነሣትና አጋንንትን ማስወጣት የሚችል ጉልበት በየትኛውም የምርምር ጣቢያና ዩኒቨርስቲ ውስጥ እንዳለ ዓለም ከተፈጠረ ጀምሮ አልተሰማም። መናን ከሰማይ የሚያወርድና ውሃን ከዐለት ለማፍለቅ የሚችል ኀይል በታሪክ ውስጥ አልተመዘገበም። ጸሎት ለደካማ ሰዎች የተሰጠ ብርቱ መለኮታዊ ክንድ ነው።

ተጨማሪ ያንብቡ

Add comment

Your email address will not be published. Required fields are marked *

SIGN UP FOR OUR NEWSLETTER.

Hintset’s latest news and articles of the week to encourage, challenge, and inform you.