[the_ad_group id=”107″]

ኢየሱስን ብቸኛ አማላጅ አድርገን መውሰድ ያለብን ዐምስት ምክንያቶች

“ቅዱሳን እና መላእክት በእግዚአብሔርና በሰው መካከል አስታራቂ ተደርገው ይታመናሉ። በሌላ አኳያ፣ በአንዳንድ ቤተ ክርስትያናት ‘የእግዚአብሔር ሰው’ በሚለው ስም በእግዚአብሔርና በሰው መካከል የቈሙ አድርገው ራሳቸውን የሚያቀርቡ ወይም እነዚህን ሰዎች እንደ መካከለኛ አድርገው የሚወስዱ ሰዎች አሉ።” ባትሴባ ሰይፉ

አንዳንድ ቀናት በኢትዮጵያ ጎዳናዎች ላይ ሰዎች ይበዛሉ፤ ሻማዎች በየቤቱም ሆነ መሥሪያ ቤቱ ይነድዳሉ፤ ቄሶች በማለዳ ይዘምራሉ። በአብዛኛዎቹ ቀናት ቅዱሳንና መላእክት ወደ እግዚአብሔር እንዲማልዱላቸው ጸሎት ያደርጋሉ። አብዛኛዎቹ የቀን መቍጠሪያ ቀናት ለመላእክት ወይም ለቅዱሳን የተሰጡ ናቸው። ቅዱሳን እና መላእክት በእግዚአብሔርና በሰው መካከል አስታራቂ ተደርገው ይታመናሉ። በሌላ አኳያ፣ በአንዳንድ ቤተ ክርስትያናት “የእግዚአብሔር ሰው” በሚለው ስም በእግዚአብሔርና በሰው መካከል የቈሙ አድርገው ራሳቸውን የሚያቀርቡ ወይም እነዚህን ሰዎች እንደ መካከለኛ አድርገው የሚወስዱ ሰዎች አሉ። ሌሎች አስታራቂዎችን ወይም መካከለኞች ከመውሰድ በተቃራኒ፣ በዚህች ዐጭር ጽሑፍ፣ ኢየሱስ ክርስቶስ ብቸኛው አማላጅ ወይም መካከለኛ አድርገን መውሰድ የሚኖርብንን ዐምስት ምክንያቶችን አቀርባለሁ። የዚህ ጽሑፍ ዐላማ ሰዎችን ወደ ክርስቶስ ማምጣትና እርሱን እንደ ብቁ እና በቂ አማላጅ መሆኑን ማሳየት ነው።

ምክንያት 1፦ ኢየሱስ ሊቀ ካህናት እንዲሆን በእግዚአብሔር ተሾሟል

እግዚአብሔር ክርስቶስን ሊቀ ካህናት አድርጎ ሾሞታል። መዝሙር 110፥4 እንደ መልከ ጼዴቅ ያለ ሊቀ ካህናት ለዘላለም እንደሚኖር ያሳያል። በዕብራውያን 5፥10 እና 7 ላይ እንደሚታየው ይህ በክርስቶስ ፍጻሜን አግኝቷል። መዝሙር 110፥4ን በዕብራውያን 5፥6 እና 10 ላይ እንመለከታለን። በተጨማሪም ዕብራውያን 7፥1-25 ይህ ሊቀ ካህናት ኢየሱስ እንደ ሆነ ይናገራል፤ በመልከ ጼዴቅ ሹመት የዘላለም ሊቀ ካህናት በሚል። ይህ ክህነት ከብሉይ ኪዳን ሊቀ ካህናት በተቃራኒ በዘር ሐረግ ሳይሆን፣ እንደ መልከጼዴቅ በእግዚአብሔር ሹመት የተደረገ ነው። እግዚአብሔር ኢየሱስን ሊቀ ካህናት አድርጎ ሾሞታል፤ ስለዚህም ሌሎች መካከለኞችን መፈለግ የለብንም።

ምክንያት 2፦ ኢየሱስ የብሉይ ኪዳን ካህናት ጥላና ትንቢቶች ፍጻሜ ነው

ብሉይ ኪዳን የካህናት ተስፋዎች እና ጥላዎች በመሲሑ ላይ እንደሚፈጸሙ ያሳያል። በብሉይ ኪዳን ካህናት በእግዚአብሔርና በሰው መካከል መካከለኛ ሆነው አገልግለዋል። በተጨማሪም መሲሑ የሊቀ ካህንነት ሚናውን እንደሚወጣ የሚገልጹ ትንቢቶች አሉ። እነዚህ ትንቢቶች በኢየሱስ ክርስቶስ ተፈጽመዋል።

በመጀመሪያ፤ የብሉይ ኪዳን ካህናት መካከለኝነት ከሰዎች ወደ እግዚአብሔር ነበር። ዘሌዋውያን 17፥11 “ደም ሳይፈስስ ስርየት የለም” እንደሚል፣ መሥዋዕትን በማቅረብ ይህን አድርገዋል። በኢሳይያስ 52-53 ላይ እንደ ተገለጸው፣ ኢሳይያስ ስለ ብዙዎች የሚሰቃየው አገልጋይ የሚሠዋበትን ትንቢት ተናግሯል (ኢሳይያስ 52-53)። መሲሑ ስለ ብዙዎች በመሞት ብዙዎችን ጻድቅ እንደሚያደርጋቸው ተናግሯል (ኢሳይያስ 53፥5፡ 10-11)። በዮሐንስ ወንጌል፣ በተለይም በዮሐንስ 17 ላይ ኢየሱስ ለተመረጡት ወደ እግዚአብሔር አብ የሊቀ ካህንነት ጸሎት ሲያቀርብ እናያለን። በተጨማሪም፣ በብሉይ ኪዳን በትንቢት እንደተመለከተው፣ ክርስቶስ ለብዙዎች ሞቷል። ለሕዝቡ ኀጢአት በራሱ ሞት መሥዋዕት አድርጓል (ለምሳሌ ዮሐንስ 10፥17ን ይመልከቱ)።

ሁለተኛ፤ ሊቀ ካህናት ከእግዚአብሔር ወደ ሰው መካከለኛ ሆነዋል። ለምሳሌ ሰዎች የእግዚአብሔርን ፈቃድ ለማወቅ ወደ ሊቀ ካህናቱ ይሄዱ ነበር (ዘኁልቅ 27፥21)፤ እንዲሁም የቤተ መቅደሱን ሥርዐት ጠብቀዋል። በተጨማሪም፣ ኢሳይያስ እንደተነበየው፣ እግዚአብሔር በዚህ ሊቀ ካህናት በኩል ከሕዝቡ ጋር ይሆናል (ኢሳይያስ 7፥14)። ኢየሱስ ክርስቶስ ይህን የሊቀ ካህናት ትንቢት በምድራዊ አገልግሎቱ ፈጽሟል። ይህንም ያደረገው ቤተ መቅደሱን በማንጻት፣ ሕግን በማክበርና ሕዝቡን በማስተማር ነው (ማቴዎስ 21፥12-17፤ ሉቃስ 21፥37)። በተጨማሪም፣ በዮሐንስ ወንጌል ምዕራፍ 1 ላይ፣ የኢሳይያስ 7 ትንቢት የእግዚአብሔር ክብር ወደ ምድር የመጣበት በእርሱ በኩል ሲፈጸም እንመለከታለን። ኢየሱስ በምድር ላይ የእግዚአብሔር ክብር መገለጫ ነው። በተጨማሪም ማቴዎስ 1፥23 በኢየሱስ በኩል እግዚአብሔር ከሰው ጋር እንደ ሆነ ያሳያል። የመካከለኝነቱ ሚና በክርስቶስ ተፈጽሟል፤ ስለዚህም ሌሎች መካከለኞችን መፈለግ የለብንም። 

ምክንያት 3፦ ኢየሱስ እውነተኛ ሰው በመሆኑ እንደ እኛ ተቈጥሯል 

ኢየሱስ ለእኛ አማላጅ ሊሆን የቻለው ፍጹም ሰው ስለ ሆነ ነው። ሰውነቱ በተለይ በመካከለኝነቱ በጣም አስፈላጊ ነው። 1ኛ ጢሞቴዎስ 2፥5 እንደሚነግረን ሰው የሆነው ኢየሱስ ክርስቶስ በሰውና በእግዚአብሔር መካከል ያለው መካከለኛ ነው። ጳውሎስ ሰብአዊነቱን ሲያጎላ እናያለን። የእርሱ ሰብአዊነት ወሳኝ ነው፤ ምክንያቱም ክርስቶስ ከእኛ እንደ አንዱ ሆኖና እኛን ወክሎ ለዘላለም ባለበት በሰማያዊው ቤተ መቅደስ ውስጥ ስለ እኛ ይማልዳልና (ዕብራውያን 2፥17–18፤ 4፥15፤ 5፥7–10፤ 7፥23–25፤ 8፥1-2)። ማንም በማይችለው ሁኔታ ከእኛ ጋር እንደ አንዱ ተቈጥሮ ለእኛ በበቂ ሁኔታ ሊማልድልን ይችላል። ስለዚህ ሌሎች አማላጆችን መፈለግ አይኖርብንም።

ምክንያት 4፦ ኢየሱስ አማላጅነቱ ተቀባይነት ያለው ፍጹም ሰው ነው

ኢየሱስ ስለ ኀጢአት ለእኛ ሊማልድልን ይችላል። ኢየሱስ ክርስቶስ ፍጹም ሰው ነው፤ ነገር ግን እንደ መጀመሪያው አዳም እንደ ሌዋውያን ካህናት፣ ሁለተኛው አዳም እና ለአብ በታማኝነት የታዘዘ እውነተኛ ሊቀ ካህናት ሆነ። በመታዘዝ ነውር የሌለበት፣ የእግዚአብሔር በግ ሆኖ ስለ እኛ ሞተ። በመሆኑም ስለ እኛ ለዘላለም ሊማልድ ተነሥቷል። በመንፈሳዊና በሥነ ምግባር ፍጹም ስለ ነበር መሥዋዕቱ በቂ ነው (ዕብራውያን 4፥15፤ 7፥26)። ለአንዴና ለመጨረሻ ጊዜ ባደረገው በመስቀሉ ሥራው ይማልድልናል። እንዲሁም፣ በሞት መከራ የፈተናውን ምንነት በግል ስለሚያውቅ ሊረዳን ይችላል (ዕብራውያን 2፥17-18)። መላእክት ሰዎች አይደሉም፣ ቅዱሳን ደግሞ ፍጹማን አይደሉም፤ በመሆኑም አማላጆች ሊሆኑ አይቻላቸውም።

ምክንያት 5፦ ኢየሱስ የአዲስ ኪዳን ብቸኛ መካከለኛ ነው

ኢየሱስ የአዲስ ኪዳን ብቸኛ መካከለኛ ነው። በክርስቶስ መሥዋዕትነት የጀመረው አንድ ኪዳን ብቻ፣ ይኸውም አዲሱ ኪዳን ነው። እግዚአብሔር ከሰዎች ጋር የሚገናኘው በዚህ ኪዳን ብቻ ነው። ስለዚህ፣ በኢየሱስ አማላጅነት የማያምን ሁሉ፣ ከእግዚአብሔር ጋር ካለው የቃል ኪዳን ግንኙነት ተገልሏል። በኤርምያስ 31 ላይ፣ አዲስ የቃል ኪዳን ማኅበረ ሰብ ሲቋቋም አይተናል። ይህ ማኅበር፣ በኤርምያስ፣ ምዕራፍ 33 ከቁጥር 20-22 በትንቢት እንደ ተነገረው፣ በሊቀ ካህናቱ ነው። በዚህ ክፍል ላይ አንዱ እንደ ተገለጸው መሲሑ የሌዋውያን ካህናት ፍጻሜ መሆኑ ነው። በተጨማሪም ዕብራውያን ምዕራፍ 8 በሊቀ ካህናቱ በኢየሱስ ክርስቶስ በኩል ስለ አዲስ ቃል ኪዳን ምሥረታ ይናገራል። በተጨማሪም፣ በማርቆስ 14፥22-25፣ ኢየሱስ ለደቀ መዛሙርቱ አዲሱ ቃል ኪዳን በእርሱ መሥዋዕት እንደ ሆነ እንደ ነገራቸው ተዘግቧል። ስለዚህም እግዚአብሔርን ማምለክ የምንችለው በእርሱ ብቻ ነው (ዕብራውያን 10፥5-10)። ሌላ መካከለኛ ይግባኝ ማለት ቤተ ክርስቲያንን ከአዲሱ ኪዳን ያገልላታል።

ለማጠቃለል፣ መጽሐፍ ቅዱስ በእግዚአብሔርና በሰው ኢየሱስ ክርስቶስ ብቻው መካከለኛ እንደ ሆነ ይነግረናል። የእግዚአብሔር አምልኮ መሆን ያለበት እርሱ ባቋቋመው መንገድ ብቻ ነው። ክርስቶስ የሚከብረው እርሱን ብቻ እንደ በቂ እና ብቸኛ መካከለኛ ስንወስድ ብቻ ነው።

Batseba Seifu

ባትሴባ ሰይፉ በአዲስ አበባ በሚገኘው “አዲስ መጥምቃውያን ቤተ ክርስቲያን” አባል ስትሆን፣ ለግል ድርጅት የንግድና ልማት ሥራ አስኪያጅ ሆና ትሠራለች። ሁለተኛ ዲግሪዋን ከኒው ዮርክ ዩኒቨርሲቲ አግኝታለች። በተጨማሪም፣ በብይነ መረብ በሚሰጡ የዳላስ ሥነ መለኮት ትምህርት ቤት በሰርቲፊኬት ደረጃ ትምህርቷን ተከታትላለች።

Share this article:

የእግዚአብሔር ሕልውና እና ሳይንስ

ሳይንስ እና ክርስትና የእግዚአብሔርን ሕልውና በሚመለከት የሚቃረኑ አስተምህሮዎችን እንደሚያራምዱ ብዙዎች ያስባሉ፡፡ አንዳንዶች፣ “ሳይንስ ያለውን ይበል፤ እኔ ግን መጽሐፍ ቅዱሴን አምናለሁ” ሲሉ፣ በተቃራኒው ያሉት ደግሞ “ሳይንስ የእግዚአብሔርን አለመኖር በበቂ ሁኔታ አረጋግጦታል” በማለት ይናገራሉ፡፡ በዚህ ጽሑፍ ሳይንስ እግዚአብሔርን “ዜሮ እንደማያወጣው” እና አምላክ አለመኖሩን እንደማያረጋግጥ ሳይንሳዊ ግኝቶችን ተመርኩዘን ለማየት እንሞክራለን፡፡

ተጨማሪ ያንብቡ

የሴራ አስተሳሰብ የጠፈረን እኛ!

አገራችን አሁን ያለችበትን ፖለቲካዊ ኹኔታ አስጊ ከሚያደርጉት ምክንያቶች አንዱ የሴራ ትርክት በአየሩ ላይ መናኘቱ እንደ ሆነ ይህ የሰሎሞን ጥላሁን ጽሑፍ እያሳሰበ ተጨባጭ ምክንያታዎነት መድረኩን እንዲረከበ ጥሪ ያደርጋል።

ተጨማሪ ያንብቡ

ዘመነ አስተርእዮ

የኢትዮጵያ ኦርቶዶክስ ተዋሕዶ ቤተ ክርስቲያን ዓመቱን በወቅቶች ከፋፍላ፥ በዚያ ላይ የተመሠረቱ መዝሙሮችን በግእዝ ለእግዚአብሔር በማቅረብና ድንቅ ሥራውን በመዘከር ትታወቃለች። ለዚህም በስድስተኛው ምእት ዓመት የተነሣው የዜማ ደራሲ ቅዱስ ያሬድ ከብሉያትና ከሐዲሳት (ከመጽሐፍ ቅዱስ)፣ ከሊቃውንትና ከመሳሰሉት መጻሕፍት ለምስጋናና ለጸሎት የሚስማሙ ንባባትን በመውሰድና ለዜማ ተስማሚ በማድረግ፥ በአራቱ ክፍላተ ዘመን እንዲነገሩ ማዘጋጀቱን የዜማ ሊቃውንት ያስረዳሉ (ጥዑመ ልሳን /ሊቀ ካህናት/ 1981፣ 28)። አራቱ ክፍላተ ዘመን የተባሉትም በዓመት ውስጥ የሚገኙት አራቱ ወቅቶች ናቸው፤ እነርሱም መፀው (ወርኀ ጽጌ ዘመነ ጽጌ/አበባ)፣ ሐጋይ (በጋ)፣ ጸደይ (በልግ) እና ክረምት ሲኾኑ፣ አኹን የምንገኘው ከአራቱ ክፍላተ ዘመን ኹለተኛው ክፍል በኾነው በበጋ (ሐጋይ) ላይ ነው።

ተጨማሪ ያንብቡ

Add comment

Your email address will not be published. Required fields are marked *

SIGN UP FOR OUR NEWSLETTER.

Hintset’s latest news and articles of the week to encourage, challenge, and inform you.