[the_ad_group id=”107″]

ጤነኛ ቤተ ክርስቲያን እንዲኖረን ኀላፊነታችንን እንወጣ

የኢትዮጵያ ወንጌላውያን ክርስትና ከመቼውም ጊዜ በበለጠ በፈተና ውስጥ እንዳለ እናምናለን፡፡ እነዚህ ፈተናዎች ደግሞ የወንጌላውያኑን ማንነት እያደበዘዙ፣ በማኅበረ ሰቡ ዘንድ ያለውን ተቀባይነት እያጠፉ፣ የአማኞችን የሕይወት ጥራት እየቀነሱ፣ ቤተ ክርስቲያን ምድራዊና ራስ ተኮር ብቻ እንድትሆን እያደረጉ ይገኛሉ፡፡ ይህ በዚህ ከቀጠለ ከተወሰኑ ዓመታት በኋላ ምን ዐይነት መልክ ሊኖረን እንደሚችል መገመት አስቸጋሪ አይሆንም፡፡

ቤተ ክርስቲያን እነዚህን ተግዳሮቶች ለመቋቋምና አልፋ ለመሄድ ብዙ መሥራት ይጠበቅባታል፡፡ ልትወጣቸው ይገባል ከምንላቸው መካከል፡- የመጽሐፍ ቅዱስ ሥልጣን ተገቢውን ስፍራ መልሶ እንዲይዝ ማድረግ፤ የቤተ ክርስቲያን አገልግሎት በተወሰኑ “ቅብዓን” ላይ ብቻ እንዲንጠለጠሉ አለማድረግ፤ ከእግዚአብሔር ለተቀበሉት መንጋ እና ለመድረኮቻቸው ተገቢውን ጥንቃቄ ማድረግ፤ እረኞች በመገናኛ ብዙኀን ለሚተላለፉ መልእክቶች ንቁ ክትትል በማድረግ ምእመናንን ወደ ጠማማ የሕይወት መንገድ ከሚወስዱ ትምህርቶች የሚጠብቁበትን ሥርዐት መዘርጋት ከብዙዎቹ ጥቂቶቹ ናቸው፡፡

የቤተ ክርስቲያን አጋዥ የሆኑ የነገረ መለኮት ተቋማትና ሌሎች የሚመለከታቸው አካለት ስለ ቤተ ክርስቲያን ጤነኛ አስተምህሮ ልዩ ትኩረት ሊሰጡ ይገባል እንላለን፡፡ ጥራት ላለው የነገረ መለኮት ትምህርት መስፋፋት ትኩረት መስጠት፤ ዐውደ ገብ የሆነ የሥነ መለኮት ሥርዐተ ትምህርት ማጎልበት፤ የኢትዮጵያ ቤተ ክርስቲያንን ችግር ፈቺ የሆኑ የምርምርና የጥናት ውጤቶችን ማበርከትና ማበረታታት፤ ኑፋቄና ኑፋቄያዊ ለሆኑ ትምህርቶች ተገቢውን ምላሽ በወቅቱ በመስጠት የዕቅበተ እምነት ኀላፊነትን መወጣት፤ በአገልግሎት መስኩ ላይ ያሉ አገልጋዮች የትምህርት ሥልጠና (የአጭር ጊዜም ሊሆን ይችላል) የሚያገኙበትን መንገድ ማመቻቸት፣ ብሎም ደረጃውን በጠበቀ መልኩ በአገርኛ ቋንቋ የሚማሩበትን ዕድል መፍጠር፡፡

ከነገረ መለኮት ትምህርት ቤቶች በተለያዩ የትምህርት ዘርፎች ተመርቀው የሚወጡ ምሩቃንም ሊጫወቱት የሚገባው ሚና ሰፊ ነው እንደ ሆነ እናምናለን፡፡ የኢትዮጵያ ቤተ ክርስቲያን ያለችበትን ሁኔታ በማጥናት ለችግሮቿ መፍትሔ የሚሆኑ ሐሳቦችን መፈንጠቅ፤ ዐውዳዊነትን የአገልግሎታቸው ማዕከል ማድረግ፤ ከአጥቢያ ቤተ ክርስቲያናት ጋር ጥሩ ግንኙነት በመፍጠር ለሥነ መለኮት ትምህርት ማበብ ምቹ ድባብን መፍጠር፤ ባገኛቸው አጋጣሚዎችና የአገልግሎት በሮች፣ ስለ መጽሐፍ ቅዱስ ፍጹም ባለ ሥልጣንነት ማስተማር፤ በአፍቅሮተ ንዋይ ሳይሳቡ የእውነትን ቃል በፍቅርና በግልጽ ማስተማር የተልእኳቸው አካል መሆኑን ማረጋገጥ ይጠበቅባቸዋል፡፡

ይህን ስንል ለወንጌላዊያን ክርስትና መፍትሔ አምጪዎች የነገረ መለኮት ተቋማትና ምሩቃኑ ብቻ ናቸው እያልን አይደለም፤ እነዚህ ተቋማት ሊጫወቱት የሚገባው ሚና እጅግ የላቀ መሆኑን ለማሳየት ነው እንጂ፡፡ ስለ ቤተ ክርስቲያን ጤነኛ አካሄድ ይገደናል የሚሉ ሁሉ ኀላፊነታቸው ትልቅ እንደ ሆነ እናውቃለን፡፡ ለክርስቶስ አካል ጤነኝነት ሁሉም እንደተሰጠው ጸጋ መጠን ይሠራ ዘንድ መልእክታችን ነው፡፡

ጋሽ በቀለ ይናገራል

መጋቢ በቀለ ወልደ ኪዳን ለአብዛኞቹ አንባቢዎቻችን የምናስተዋውቃቸው ዐይነት ሰው አይደሉም። በአጭሩ ለዐርባ ዓመታት ያህል በዘለቀው አገልግሎታቸው፣ መጋቢ ከሆኑባት የኢትዮጵያ ሙሉ ወንጌል ቤተ ክርስቲያን ባሻገር ብዙዎቹን አብያተ ቤተ ክርስቲያናት፣ ከተማ ገጠር፣ አገር ቤት ውጪ አገር ብለው ያገለገሉ መሆናቸው፣ በወጣቱም ሆነ በቀደሙት ዘንድ ታዋቂ አድርጓቸዋል። ለዚህ ነው የምናስተዋውቃቸው ዐይነት ሰው አይደሉም ማለታችን። መጋቢ በቀለ በብዙዎች ዘንድ “ጋሽ በቄ” በሚል ስም ነው የሚጠሩት።

ተጨማሪ ያንብቡ

የልየታ መንፈስ ጥሪ!

ንጉሤ ቡልቻ በዚህ ጽሑፋቸው፣ ምስቅልቅል ለበዛበት የአማኞች አምልኳዊ ገቢር መፍትሔ እንዲመጣ፣ “የልየታ መንፈስ” ይፈስስ ዘንድ ለአምላክ ተማጽኖ፣ ለምእመናንም ምክሮች ይለግሳሉ።

ተጨማሪ ያንብቡ

Add comment

Your email address will not be published.

SIGN UP FOR OUR NEWSLETTER.

Hintset’s latest news and articles of the week to encourage, challenge, and inform you.