ጲላጦስማንነው?

በሉትራን ቤተ እምነት፣ ከጌታ በመቀጠል ብዙ ጊዜ ስሙ የሚጠራው ሰው፣ ጳውሎስ ወይም ጴጥሮስ ወይም ከነቢያት አንዱ ወይም ሉተር አይመስለኝም። በእኔ ግምት ጲላጦስ ነው። በሐዋርያት የእምነት መግለጫም ሆነ በኒቂያ የእምነት መግለጫዎች ላይ ስሙ የተጠቀሰ ብቸኛ ግለ ሰብ ቢኖር ጲላጦስ ነው። እነዚህ የእምነት መግለጫዎች ስለ ሥላሴና ስለ ክርስቶስ ሰውነትና አምላክነት የሚገልጡ ናቸው። በየእሑዱ በቤተ ክርስቲያን ውስጥ ምእመናን እምነታቸውን ያሳውቁባቸዋል። 

የቤተ ክርስቲያን አባቶች ለምን የእነርሱን ስም አስገቡ የሚለውን ለሌላ ጊዜ እንተወው። ግን ከትውልድ ትውልድ በተላለፉና ሉትራን ብቻ ሳንሆን፣ የኢትዮጵያ ኦርቶዶክስ ቤተ ክርስቲያንም ሆነ ካቶሊክ ቤተ ክርስቲያን በሚቀበሏቸው በእነዚህ መግለጫዎች መካተቱ ግርም የሚል ነው። በዚህ የተነሣ በተለያዩ ቋንቋንዎች ጲላጦስ በየእሑዱም ሆነ ከዚያ ውጭ በሚኖሩ የአምልኮ ሥነ ሥርዐቶች ላይ ስሙ ይነሣል። 

ጲላጦስ በጣም ጨካኝ መሪ ነበር። የታሪክ ድርሳናት እንደሚያወሱት ከሥልጣኑ የመወገዱ ምክንያቱ፣ ያለ አግባቡ ለሃይማኖት ብለው የተሰሰቡ የሰማርያ ሰዎችን በመግደሉ ነበር። ጕዳዩ ከፖለቲካ ጋር ያልተገናኘ ነው ብለው ተቀማጭነቱ ሶሪያ ለነበረ ለሌላ የሮም አለቃ ክስ ስለቀረበበት፣ ሮም በጢባሪዮስ ዘንድ እንዲቀርብ ተወሰነበት። በኢየሩሳሌም ለዐሥር ዓመታት ገዥ የነበረ ሲሆን፣ የጌታ የምድር አገልገሎት በእርሱ የሥልጣን ዘመን ተጀምሮ የተጨረሰ ነው። ጌታ ብቻ ሳይሆን መጥምቁ ዮሐንስም እርሱ በሥልጣን እያለ ነበር ያገለገለው። 

በሌሎች የክርስትና እምነቶች ዘንድ፣ ጲላጦስ በክርስቶስ አምኖ መሥዋዕትነት ከሚስቱ ጋር ተቀብሏል ተብሎ ይታመናል። ለምሳሌ፣ በኢትዮጵያ ኦርቶዶክስ ተዋሕዶ ቤተ ክርስቲያን፣ ጲላጦስን እንደ ሰማዕት ተደርጎ የሚቈጠር ሲሆን፣ ካልተሳሳትሁ ሰኔ ላይ የሚዘከርበት ቀን አለው። 

እኔ እንደምረዳው፣ ይህ ሰው ለሥልጣኑ ያደረ ከመሆኑ የተነሣ፣ ከሾመው የሮም መንግሥት ጋር እንዳይጣላ ፈርቶ ጻድቁን ጌታ እንዲሰቀል ፈርዶበታል። ፍርድን ስናነሣ የታሪክ ጽሑፎች ከእርሱ በፊት ከነበሩ የሮማ ሹማምንት በተለየ፣ በይሁዳ ግዛት ፍርድ እንዲሰጥም ልዩ ሥልጣን የተሰጠው እንደ ነበር ተነግሮለታል። ነገር ግን፣ ይህን ዕድል ለመልካም አልተጠቀመውም። በርባንን ለቅቆ ጌታን አስገርፎ ሰቅሎታል። ሚስቱ የነገረችውን አለመስማቱ፣ “እውነት ምንድን ነው?” ብሎ ከእውነት ጌታ ተነግሮት ያለመስማቱ፣ ሥልጣን ምን ያህል ልቡን እንዳሸነፈው ያመለክታል። ሕዝቡ፣ ‘ለቄሳር ያደርህ አይደለህም’ ብሎ እንዳይከስሰው በመፍራት፣ እውነትን እያወቀ እውነትና መንገድ የሆነውን ጌታ እንዲሰቀል ፈርዶበታል። ስለዚህም ክፉ ሥራው ከዘመን ዘመን እየተሻገረ ይነገራል። 

ዛሬስ፤ ለሥልጣኑና ለገዛ ጥቅሙ ሲል ስንቱ ነው ጌታን እያወቀ አሳልፎ የሰጠው? ላለመነካካት ሲል እውነትን ያልካደ ማን ነው? ጌታ በልዩ ልዩ መንገድም ሆነ በቃሉ ተናግሮት፣ ግን ለገዛ ፈቃዱ ያልሮጠ ማን ነው? እኔም ጲላጦስ ነኝ! ጸጋውን በዝቶ መለሰኝ እንጂ። ጌታ ጸጋውን ያብዛልን!