[the_ad_group id=”107″]

ለማነጽ እንሠራለን!

ሕንጸት ክርስቲያናዊ ማኅበር፣ ስለ ጌታችን ኢየሱስ ክርስቶስና ስለ ወንጌሉ እውነት እንዲሁም እርሱ ስለ መሠረታት ቤተ ክርስቲያን ግድ የሚላቸው ሰዎች ተሰባስበው ያቋቋሙት መንፈሳዊ ማኅበር ነው፡፡ ማኅበሩ በምድራችን ላይ ያለችው ወንጌላዊት ቤተ ክርስቲያን፣ ክርስቶስን መስላ እንድታድግ በሚደረገው የማነጽ ሂደት ውስጥ የበኩሉን ድርሻ ለመወጣት ያለመ ነው፡፡ ስያሜውም ይህንኑ የሚገልጽ ነው፤ “ሕንጸት” የግዕዝ ቃል ሲሆን፣ “ማነጽ” ወይም “መገንባት” የሚለውን ፍቺ ይይዛል፡፡

ሕንጸት ክርስቲያናዊ ማኅበር በተግባራቱ በኩል ተፈጽሞ ማየት የሚፈልገው ራእይ አለው፤ ይህም፡- “የወንጌላዊያን ክርስቲያን ማኅበረ ሰብ መጽሐፍ ቅዱሳዊ በሆነ ክርስቲያናዊ አስተምህሮ እና ሥነ ምግባር ላይ ታንጾ፣ የወንጌል ተልእኮውን ሲወጣ ማየት፡፡” የሚል ነው፡፡

ሕንጸት መጽሔት ማኅበሩ ራእዩን ለማሳካት ከሚጠቀምባቸው መንገዶች አንዱ ነው፡፡ ሕንጸት መጽሔት በይዘትም ሆነ በቅርጽ ደረጃውን የጠበቀ እንዲሆን ከፍተኛ ጥረት ተደርጓል፡፡ ይህንን ስንል ሥራችን እንከን አልባ ነው ማለታችን አይደለም፤ ይልቁን በተሻለ ደረጃ ለማገልገል ብዙ እንደሚቀረን እናምናለን፡፡ የመጽሔቱ ስያሜ እንደሚጠቁመው፣ የክርስቶስን ቤተ ክርስቲያን ለማነጽ ብቻ እግዚአብሔር የሰጠንን ጉልበትና ጊዜ እንደምንጠቀም ተስፋ እናደርጋለን፡፡

ማኅበሩ እውን እንዲሆን በርካታ ሰዎችና ተቋማት ዐይነቱ የተለያየ ድጋፍ አድርገዋል፡፡ ልንሠራ ያሰብነውን በነገርናቸው ጊዜ በራእያችን በማመን አብሮነታቸውን የገለጹልንንና ሐሳባቸውን፣ ገንዘባቸውን፣ ጊዜያቸውንና ጉልበታቸውን የሰጡንን ወገኖቻችንን ልናመሰግን እንወዳለን፡፡

ለሕንጸት አንባቢያንን በአጠቃላይ የምንለው ቢኖር፣ የምንጽፈውን በማንበብ ሐሳባችሁንና አስተያየታችሁን እንድታካፍሉን በአክብሮት እየጠየቅን፣ እውነት ያለበትን፣ ቅንነት የሞላበትንና ለእግዚአብሔርና ለመንግሥቱ የሚሆነውን ምክር ሁሉ እንደምንሰማ ርግጠኞች በመሆን ነው፡፡ እናገለግለው ዘንድ ዕድል የሰጠን እግዚአብሔር ይመስገን!

Share this article:

Share on facebook
Share on telegram
Share on email
Share on twitter
Share on whatsapp
SIGN UP FOR OUR NEWSLETTER.

Hintset’s latest news and articles of the week to encourage, challenge, and inform you.