[the_ad_group id=”107″]

በዓሉን በእውነተኛ የፍቅር ተግባር የማክበር ጥሪ ቀረበ

April 29, 2016
በዓሉን በእውነተኛ የፍቅር ተግባር የማክበር ጥሪ ቀረበ

የኢትዮጵያ ወንጌላውያን አብያተ ክርስቲያናት ኅብረት ፕሬዚደንት መጋቢ ጻድቁ አብዶ የትንሣዔ በዓልን በማስመልከት እንዲሁም በሌሎች ጕዳዮች ላይ ባላፈው ሰኞ ሚያዝያ 17 ቀን፣ 2008 ዓ.ም. በኅብረቱ ጽሕፈት ቤት ለወንጌላውያን የሚዲያ ተቋማት ጋዜጣዊ መግላጫ ሰጡ፡፡

ፕሬዚደንቱ የስቅለትንና የትንሣዔን በዓላት አስመልክቶ መልእክታቸውን ከማስተላለፋቸው በፊት በቅርቡ በጋምቤላ የደረሰውን ጥቃት አስታውሰው ጽ/ቤታቸው የተሰማውን ሐዘን በድጋሚ እንደሚገልጽ ተናግረዋል፡፡ አያይዘውም፣ በአሁኑ ጊዜ ከቤተ ሰቦቻቸው ተለይተው ያሉ ሕፃናት በሰላም ወደ አገራቸው እንዲመለሱ ጸሎታቸው መሆኑን ጠቁመዋል፡፡

ሚያዝያ 21 እና 23 የሚከበረው የስቅለትና የትንሣዔ በዓላት ዐበይት የክርስትና እምነት የሆኑትን የክርስቶስን መሞት፣መቀበር እና ከሞት መነሣትን የሚመሰክሩ እንዲሁም ጥላቻ በፍቅር፣ በደል በምሕረት፣ ሞት በትንሣኤ የተረታበት እንደ መሆኑ መጠን በዓላቱ በእውነተኛ የፍቅር ተግባር እንዲከበር መጋቢያዊ መልእክታቸውን አስተላልፈዋል፡፡

እንደ መጋቢ ጻድቁ ገለጻ የዘንድሮው የትንሣኤ በዓል አከባበር በኢትዮጵያ ወንጌላዊያን አብያተ ክርስትያናት ኅብረት ሥር ባሉ ቤተ እምነቶች አዲስ አበባን ጨምሮ በመላው አገሪቱ በተፈቀዱና ሕዝብ በሚሰበሰብባቸው አደባባዮች ይከበራል፡፡ በዕለቱ በሁሉም ክልሎች፣ ዞኖችና ከተሞች በሚካሄዱ ፕሮግራሞች የሚሰበሰበው መባና ሥጦታም በድርቅ ለተጎዱ ወገኖች ድጋፍ የሚውል እንደ ሆነ ከመግላጫው ለመረዳት ተችሏል፡፡

ከዚህ ቀደም በአዲስ አበባ ስታዲየም መሰል የበዓላት ፕሮግራሞችን ያሰናዳ የነበረውና በዶ/ር ቶሎሳ ጉዲና የሚመራው አገልግሎት የነበረ መሆኑን ያስታወሱት መጋቢ ጻድቁ፣ ከዚህ በኋላ የሚኖሩትን መሰል የአደባባይ የበዓላት መርሓ ግብሮችን በሙሉ ኀላፊነት እንደሚያዘጋጅ ከዚህ ቀደም የሰጡትን መግለጫ ጠቅሰው አስታውሰዋል፡፡ እሳቸው ይህን ይበሉ እንጂ፣ ዶ/ር ቶሎሳ ኅበረቱ በተገቢው መንገድ ሳያሳውቃቸው የበዓል ዝግጅቱን አስተባብራለሁ ማለቱ ቅሬታ ፈጥሮባቸዋል በሚል ከጋዜጠኞች ለቀረበላቸው ጥያቄ ምላሽ የሰጡት መጋቢ ጻድቁ፣ ከዚህ በፊት ሚኒስትሪው ይህን መሰሉን ፕሮግራሞች በማዘጋጀቱ ረገድ ላበረከተው አስተዋጽኦ አመስግነው፣ በቀጣይ የቤተ ክርስቲያን አጋር አገልግሎቶች (ሚኒስትሪዎች) ኅብረቱን በተለያዩ መንገዶች እንዲደግፉ ጥሪ አቅርበዋል፡፡

Latest News

SIGN UP FOR OUR NEWSLETTER.

Hintset’s latest news and articles of the week to encourage, challenge, and inform you.