[the_ad_group id=”107″]

“ኮምፓስ” የሦስት ቀን የመሪዎች ጕባኤ አካሄደ

February 13, 2016
“ኮምፓስ” የሦስት ቀን የመሪዎች ጕባኤ አካሄደ

ኮምፓስ ዳይሬክሽንስ ፎር ላይፍ፣ የ“ልቀት የመሪዎች መሪ” የተሰኘ የሦስት ቀን ጕባኤ ተካሄደ፡፡ ከጥር 30 እስከ የካቲት 2፣ 2008 ዓ.ም. በቢሾፍቱ ከተማ በተካሄደው በዚህ መርሓ ግብር ላይ የኢትዮጵያ ወንጌላውያን አብያተ ክርስቲያናት ኅብረት የቦርድ ሰብሳቢዎችን ጨምሮ፣ ኀምሣ የሚደርሱ የቤተ እምነት የቤተ ክርስቲያን አጋር አገልግሎት መሪዎች ተገኝተውበታል፡፡ የመርሓ ግብሩ ትኩረት መሪዎች “በልባቸው፣ በአእምሯቸው እና በክኅሎታቸው” እግዚአብሔርን ማገልገል እንዲችሉ ለማስቻል ሲሆን፣ ከዚያ ባለፈ በመሪዎች መካከል ኅብረትን ለመፍጠርና ትሥሥራቸውን ለማዳበር የታሰበ እንደ ሆነ የኮምፓስ ዳይሬክሽንስ ፎር ላይፍ መሥራችና ፕሬዚዳንት መጋቢ እንዳልካቸው ሣህለ በተለይ ለሕንጸት ተናግረዋል፡፡

በሦስቱ ቀን ጕባኤ ላይ ተናጋሪዎች የነበሩት አቶ ሽፈራው ወ/ሚካኤል (የኮምፓስ ዳይሬክሽንስ ፎር ላይፍ በኢትዮጵያ የቦርድ ሰብሳቢ)፣ ዶ/ር መልሳቸው መስፍን፣ ዶ/ር ቤተ መንግሥቱ፣ ዶ/ር ምሕረት ደበበ፣ መጋቢ ዶ/ር በድሉ ይርጉ እና መጋቢ እንዳልካቸው ሣህለ ናቸው፡፡ የእግዚአብሔርን ቃል በስብከት መልክ ያቀረቡት ደግሞ ቄስ በላይነህ አለማየሁ ነበሩ፡፡

ተመሳሳይ መርኀ ግብር ከሁለት ዓመት በፊት በዚሁ አገልግሎት አማካኝነት ተካሄዶ እንደ ነበረና ይህንኑ በየዓመቱ ለማድረግ ዕቅድ እንዳለ አዘጋጆቹ በማብቂያ ሥነ ሥርዐቱ ላይ ገልጸዋል፡፡ ጕባኤውን የተካፈሉት የቤተ እምነት መሪዎች በመጨረሻ ላይ እንደጠቆሙት፣ ይህን መሰሉ አገልግሎት ሊደገፍ እንደሚገባውና በቀጣይም የቤተ ክርስቲያን ፈተናዎች በሆኑ ጕዳዮች ላይ ጭምር ጥናቶች ተካሄደው ሊቀርቡ እንደሚገባ ሐሳባቸውን ገልጸዋል፡፡

ኮምፓስ ዳይሬክሽንስ ፎር ላይፍ ከዚሁ ከ“ልቀት የመሪዎች ጕባኤ” በተጨማሪ፣ በዐይነቱ የመጀመሪያ ነው የተባለለት የቅዱሳት መጻሕፍት ማብራሪያ እያዘጋጀ ሲሆን፣ ሃያ ሰባቱን የአዲስ ኪዳን መጻሕፍት አገርኛ ዐውዱን በጠበቀ መልኩ በተለያዩ የመጽሐፍ ቅዱስ አስተማሪዎች አማካኝነት ለንባብ ለማቅረብ ጥረት እያደረገ ያለ አገልግሎት መሆኑ ይታወቃል፡፡

Latest News

SIGN UP FOR OUR NEWSLETTER.

Hintset’s latest news and articles of the week to encourage, challenge, and inform you.