የኢትዮጵያ ሥነ መለኮት ድኅረ ምረቃ ት/ቤት ዶ/ር ምስጋና ማቴዎስን የተቋሙ አራተኛ ዳይሬክተር አድርጎ ሾመ፡፡ ታኅሣሥ 19 ቀን፣ 2008 ዓ.ም. በት/ቤቱ መሰብሰቢያ አዳራሽ በተካሄደው ሥነ ሥርዐት ላይ፣ “ኤግስት”ን በባለ ቤትነት የሚያስተዳድሩት የቤተ እምነት መሪዎች እና ጥሪ የተደረገላቸው እንግዶች ተገኝተዋል፡፡

የሥነ መለኮት ትምህርት ቤቱን ላለፉት ስምንት ዓመታት የመሩት ዶ/ር ደስታ ሄሊሶ የአገልግሎት ጊዜያቸውን በማጠናቀቃቸው ነው አዲስ ዳይሬክተር መሾም ያስፈለገው፡፡ ዶ/ር ደስታ ተቋሙን በመሩባቸው ባለፉት ስምንት ዓመታት ት/ቤቱን ወደ ላቀ ደረጃ ማድረሳቸውን በዕለቱ ተናጋሪ የነበሩ ግለ ሰቦች አጽንኦት ሰጥተው የተናገሩ ሲሆን፣ ስኬቶቻቸውን በማወደስ ምስጋና እና ዕውቅና ተሰጥቷቸዋል፡፡

የኢትዮጵያ ወንጌላዊት ቤተ ክርስቲያን መካነ ኢየሱስ ፕሬዚደንት እና የኢትዮጵያ ሥነ መለኮት ድኅረ ምረቃ ት/ቤት የቦርድ ሰብሳቢ የሆኑት ዶ/ር ዋቅስዩም ኢዶሳ ባደረጉት ንግግር፣ ትምህርት ቤቱ በተሰናባቹ ዳይሬክተር አመራር ለደረሰበት አስተማማኝና የተረጋጋ ዕድገት ምስክር መሆናቸውን ገልጸዋል፡፡ “አራተኛውን የኤግስት ዳይሬክተር ስንሾም ወደ አዲስ ምእራፍ እየገባን ነው ያሉት” ዶ/ር ዋቅስዩም፣ የተቋሙን ዕድገት ለማስቀጠል ባለ ድርሻ አካላት ሙሉ ከአዲሱ አመራር ጎን እንደሚቆሙ ጠቁመዋል፡፡

ዶ/ር ደስታ ሄሊሶ በበኩላቸው፣ በእርሳቸው የአገልግሎት ዘመን ለተሠሩት ሥራዎችና ለመጣው ስኬት በቅደሚያ እግዚአብሔርን ቀጥሎም፣ የሥራ ባልደረቦቻቸውን፣ የቦርድ አመራር አባላትን እንዲሁም በዓለም ዙሪያ ያሉ የተቋሙ ወዳጆችን አመስግነዋል፡፡

አዲሱ ተሿሚ ዶ/ር ምስጋና ማቴዎስ በሥነ መለኮት ትምህርት ዲፕሎማ እና የመጀመሪያ ዲግሪያቸውን ከመካነ ኢየሱስ ሴሚናሪየም፣ ሁለተኛ ዲግሪያቸውን ኖርዌይ አገር በሚገኘው “School of Mission and Theology – Stavanger” በ“Biblical Studies” አግኝተዋል፡፡ በማስከተልም በታላቋ ብሪታኒያ በሚገኘው “University of Gloucestershire” የPGD ትምህርታቸውን በ“Biblical Studies” ካጠኑ በኋላ፣ ከተመሳሳይ ተቋም የPhD ዲግሪያቸውን በ“Theology” አግኝተዋል፡፡ በአሁኑ ጊዜ “Postdoctoral” ጥናታቸውን በማካሄድ ላይ ይገኛሉ፡፡ ዶ/ር ምስጋና ከአዲሱ የፈረንጆች ዓመት ጀምሮ ለመጪዎቹ አራት ዓመታት ት/ቤቱን በዳይሬክተርናት እንደሚመሩ ይጠበቃል፡፡

የኢትዮጵያ ሥነ መለኮት ድኅረ ምረቃ ት/ቤትን የኢትዮጵያ ወንጌላዊት ቤተ ክርስቲያን መካነ ኢየሱስ እና የኢትዮጵያ ቃለ ሕይወት ቤተ ክርስቲያን በዋና የባለ ቤትነት የሚያስተዳድሩት ሲሆኑ፣ የኢትዮጵያ ወንጌላውያን አብያተ ክርስቲያናት ኅብረት አነስተኛ ውክልና አለው፡፡ ዐሥራ ስምንት ዓመታት ያስቆጠረውን ትምህርት ቤት የመጀመሪያ ዳይሬክተር በመሆን ያገለገሉት የውጪ አገር ዜጋ የሆኑት ዶ/ር ፒተር ኮተሬል ሲሆኑ፣ እሳቸውን ተክተው ዶ/ር ደበላ ቢሪ ት/ቤቱን መርተዋል፡፡ እ.አ.አ. በ2007 ከዶ/ር ቢሪ ኀላፊነቱን የተረከቡትና ያለፉትን ስምንት ዓመታት የመሩት ዶ/ር ስታ ሄሊሶ ነበሩ፡፡