[the_ad_group id=”107″]

የኢትዮጵያ ወንጌላውያን መሪዎች ኅብረት መቋቋሙ በይፋ ተገለጸ

November 18, 2018
የኢትዮጵያ ወንጌላውያን መሪዎች ኅብረት መቋቋሙ በይፋ ተገለጸ

የኢትዮጵያ ኢቫንጄሊካል ሊደርስ ፌሎውሺፕ የተሰኘና በተለያዩ የመሪነት ኀላፊነት ላይ የተሰማሩ ግለ ሰቦችን ያቀፈ ኅብረት፣ ኅዳር 10 ቀን፣ 2011 ዓ.ም. በኢንተርኮንቲኔንታል ሆቴል በተዘጋጀ መርሓ ግብር ላይ በይፋ መመሥረቱ ተገለጸ።

የኅብረቱ የቦርድ ሰብሳቢ የሆኑት ሐዋርያው ዮሐንስ ግርማ ባደረጉት ንግግር፣ የኅብረቱ መመሥረት አማኝ ማኅብረ ሰቡ ያገኛቸውንና ሊጠቀምባቸው ያልቻላቸውን ዕድሎች ለመጠቀምና የሚገጥሙትን የጋራ ፈተናዎች ለመጋፈጥ ጉልሕ እገዛ እንደሚያበረክት እምነታቸውን መሆኑን ተናግረዋል። ኅብረቱ የቤተ እምነቶች ኅብረት ሳይሆን፣ በመሪነት አገልግሎት ላይ የተሰማሩ ግለ ሰቦች፣ ማለትም የአብያተ ክርስቲያናትና አጥቢያ መሪዎች፣ የቤተ ክርስቲያን አጋር ተቋማት፣ ክርስቲያናዊ ድርጅቶች መሪዎችና የክርስቲያን ባለሙያዎችንና በንግድ ሥራ የተሰማሩ፣ እንዲሁም በሕዝብ አገልግሎት ላይ ያሉ መሪዎች ኅብረት መሆኑንም ጨምረው አብራርተዋል። 

አዲሱ ኅብረት ከኢትዮጵያ ወንጌላውያን አብያተ ክርስቲያናት ኅብረት ጋር በጋራ ለመሥራት የመግባቢያ ሰነድ መፈራረሙ በዕለቱ የተገለጸ ሲሆን፣ የኢትዮጵያ ወንጌላውያን አብያተ ክርስቲያናት ኅብረት ፕሬዚዳንት መጋቢ ጻድቁ አብዶ ባደረጉት ንግግር ይህንኑ አረጋግጠዋል። “ኅብረቱ እንደ አንድ ክንድ እንጂ፣ እንደ ሥጋት አያየውም” ያሉት መጋቢ ጻድቁ፣ እግዚአብሔርን ለማክበር፣ ለቤተ ክርስቲያን መታነጽና አንዱ ሌላውን በወንድምነት የሚገስጽበት መድረክ እስከ ሆነ ድረስ፣ እሳቸውም ሆነ የሚመሩት ኅብረት ድጋፍ እንደማይለየው ተናግረዋል።

በዕለቱ በክብር እንግድነት የተገኙት የአዲስ አበባ ከተማ መስተዳድር ከንቲባ ክቡር ታከለ ኡማ ባደረጉት አጭር ንግግር፣ “እዚህ አገር መጀመር በጣም ቀላል ነው” ያሉ ሲሆን፣ መከፈል ያለበት ዋጋ ተከፍሎ ኅብረቱ የታለመለት ግብ ላይ እንዲደርስ ለአባላቱ በዐደራ ጭምር ጥሪ አድርገዋል።

የኢትዮጵያ ኢቫንጄሊካል ሊደርስ ፌሎውሺፕ አባላትን የሚቀበልበት ሦስት ደረጃዎች ያሉት መሆኑን ያብራሩት ዶ/ር ቤዛለም ፍስሓ (መጋቢ)፣ በዚሁ መሠረት የቤተ እምነትና አጥቢያ መሪዎች አባል፣ የአጋር ቤተ ክርስቲያንና የክርስቲያን ድርጅቶች መሪዎች እንዲሁም የክርስቲያን ባለሙያዎችን፣ ነጋዴዎችና የሕዝብ አገልጋዮች ተባባሪ አባል ሲሆኑ፣ ለረጅም ዘመናት በአገልግሎት ላይ የቆዩ ወንድሞችና እኅቶች የክብር አባል እንደሚሆኑ ተገልጿል።

Photos © Courtesy of Yohannes ‘Johnny’ Girma

Latest News

SIGN UP FOR OUR NEWSLETTER.

Hintset’s latest news and articles of the week to encourage, challenge, and inform you.