[the_ad_group id=”107″]

ኅብረቱ ቲቢ ጆሽዋን አያስመጣም ተባለ

September 18, 2015
ኅብረቱ ቲቢ ጆሽዋን አያስመጣም ተባለ

የኢትዮጵያ ወንጌላውያን አብያተ ክርስቲያናት ኅብረት ናይጄሪያዊውን የሲናጎግ ቸርች ኦፍ ኦል ኔሽን መሪ ቲቢ ጆሽዋን ወደ ኢትዮጵያ እንዲመጡና አገልግሎት እንዲሰጡ ግብዣ አድርጎ እንደ ነበረና ይኸው ጉዳይ በኅብረቱ የአመራር ቦርድ ልዩነት በመፍጠሩ የኅብረቱ የሥራ አመራር ቦርድ በድምፅ ብልጫ ጆሽዋ በኅብረቱ በኩል እንዳይመጡ ለመጨረሻ ጊዜ መወሰኑ ተነገረ፡፡

በሌላ በኩል ኅብረቱ ውስጥ ያሉና የግለ ሰቡን መምጣት የሚደግፉ ቤተ እምነቶች “የወንጌል ሪቫይቫል ኮንፈረንስ” የተባለ አሰባሳቢ ኮሚቴ አዋቅረው ቲቢ ጆሽዋ የሚያካሂዱትን ኮንፈረንስ እያዘጋጁ እንደ ሆነ ለማወቅ ተችሏል፡፡ ፕሮግራሞቹም በአዲስ አበባ እና በሐዋሳ ከተሞች እንደሚካሄድ ኮሚቴው አሳውቋል፡፡

ኮሚቴው ለሕንጸት በላከው መግለጫ ላይ እንዳሰፈረው፣ ቲቢ ጆሽዋ ወደ ኢትዮጵያ እንዲመጡ የተፈለገበት ዐላማ፡- “ብዙዎች የሚጠሙትን መንፈሳዊ ተሓድሶ ለማምጣት እንዲያግዝ፣ ለብዙዎች የነፍስ መዳንና ፈውስ የሚያስገኝ፤ ከሁሉም በላይ ለአምላካችን እግዚአብሔር ክብር የሚያመጣ – ብሎም ለአገራችን በጎ ተጽእኖ የሚፈጥር እንዲሆን” ነው ይላል፡፡

በተያያዘ ቲቢ ጆሽዋ ከመስከረም 8 – 11 2008 ዓ.ም. በአዲስ አበባ ያደርጉታል የተባለው ኮንፈረንስ ወደ ጥቅምት ወር መሸጋገሩ ተነገረ፡፡ የወንጌል ሪቫይቫል ኮንፈረንስ አስተባባሪ ኮሚቴው ሰብሳቢ የሆኑት መጋቢ ኅሩይ ጽጌ ለሕንጸት እንደተናገሩት ከሆነ የቲቢ ጆሽዋ መዘግየት የተከሰተው ከዝግጅት ጊዜ ዕጥረት የተነሣ ነው፡፡ ስለሆነም በጥቅምት ወር ላይ አገልጋዩን ለማምጣት ስምምነት ላይ መደረሱንና ለኮንፈራንሶቹ የሚሆን ፈቃድ ከመንግሥት ለማግኘት በሒደት ላይ መሆናቸውን ተናግረዋል፡፡

በግለ ሰቡ መምጣት ላይ ጽኑ ተቃውሞ ካላቸው ቤተ እምነቶች መካከል መሠረተ ክርስቶስ ቤተ ክርስቲያን እና የኢትዮጵያ አማኑኤል ኅብረት ቤተ ክርስቲያን ይገኙበታል፡፡ የኢትዮጵያ ሙሉ ወንጌል አማኞች ቤተ ክርስቲያን፣ የኢትዮጵያ ጉባኤ እግዚአብሔር ቤተ ክርስቲያን፣ የኢትዮጵያ የሕይወት ብርሃን ቤተ ክርስቲያን፣ የምርጦቹ ሰባት ሺህ ቤተ ክርስቲያን እና ዘፀኣት አፖስቶሊክ ሪፎርሜሽን ቤተ ክርስቲያን የቲቢ ጆሽዋ ወደ ኢትዮጵያ መምጣት ላይ ጥያቄ ያላቸውና ጊዜው አይደለም የሚሉ ናቸው፡፡

ከኅብረቱ ውጪ ያሉና የቲቢ ጆሽዋን መምጣት ከማይቀበሉ ቤተ እምነቶች መካከል የኢትዮጵያ ወንጌላዊት ቤተ ክርስቲያን መካነ ኢየሱስ፣ የኢትዮጵያ ቃለ ሕይወት ቤተ ክርስቲያን፣ የኢትዮጵያ ብርሃነ ወንጌል መጥምቃውያን ቤተ ክርስቲያን እና ቤዛ ባብቲስት ቤተ ክርስቲያን እንደሚገኙበት በመነገር ላይ ነው፡፡

Latest News

SIGN UP FOR OUR NEWSLETTER.

Hintset’s latest news and articles of the week to encourage, challenge, and inform you.