[the_ad_group id=”107″]

ሁለንተናዊ የተባለ የወንጌል ፌስቲቫል በመካሄድ ላይ ነው

November 8, 2017
ሁለንተናዊ የተባለ የወንጌል ፌስቲቫል በመካሄድ ላይ ነው

የኤስ.ኦ.ኤስ. ዓለም አቀፍ የወንጌል አገልግሎት ከኢትዮጵያ ጉባኤ እግዚአብሔር ቤተ ክርስቲያን ጋር በመተባበር ከጥቅምት 25 እስከ ኅዳር 3 ቀን፣ 2010 ዓ.ም. “ሁለተንተናዊ ነው” የተባለለት የወንጌል አገልግሎት በመስጠት ላይ መሆኑ ተነገረ፡፡ በመሰጠት ላይ ያለው አገልግሎት ስማቸው በዝርዝር ካልተጠቀሱ ሌሎች የወንጌላውያን አብያተ ክርስቲያናት ጋር በአብሮነት መዘጋጀቱም ተያይዞ ተጠቅሷል፡፡

የኤስ.ኦ.ኤስ. ዓለም አቀፍ የወንጌል አገልግሎት ፕሬዚዳንት የሆኑት መጋቢ ጆሃንስ አምራትዘር ሰኞ ጥቅምት 27 ቀን፣ 2010 ዓ.ም. በሳሮማሪያ ሆቴል ለተለያዩ አብያተ ክርስቲያናት መሪዎች፣ የመንግሥት ባለ ሥልጣናት፣ ለብዙኀን መገናኛዎች፣ ለነጋዴዎችና በተለያዩ የሙያ ዘርፍ ለተሰማሩ ስለ ኤስ.ኦ.ኤስ ዓለም አቀፍ አገልግሎትና በአዲስ አበባ ከተማ በመካሄድ ላይ ስላለው “የወንጌል ፌስቲቫል” ገለጻ አድርገዋል፡፡

በዚሁ የወንጌል አገልግሎት ላይ ለመሳተፍ ቊጥራቸው ሁለት መቶ የሚደርስ የአገልግሎቱ አባላት አብራዋቸው እንደ መጡ የተናገሩት መጋቢ ጆሃንስ፣ ከቡድን አባላቱ መካከል የሕክምና ባለሙያዎች፣ በአውሮፓና አሜሪካ በንግድ ሥራ ላይ የተሰማሩ የንግድ ሰዎችና ሌሎች ባለሙያዎች እንደሚገኙበት አብራርተዋል፡፡

ይህ ሁለንተናዊ የወንጌል አገልግሎት አቅም ለሌላቸው የዐይን ሕሙማን ነጻ ሕክምና እና ነጻ የመነፅር ድጋፍ መስጠትን የሚያካትት ሲሆን፣ ይህም ከትላንት ጥቅምት 28 ጀምሮ እስከ ነገ ጥቅምት 30 ቀን፣ 2010 ዓ.ም. ድረስ መካኒሳ በሚገኘው የጉባኤ እግዚአብሔር ቤተ ክርስቲያን ቅጥር ግቢ ውስጥ በመሰጠት ላይ ነው፡፡ የዐይን ሕክምና ቡድን መሪ የሆኑት ማርቲና ኮንኩዌስት ለሕንጸት እንደተናገሩት፣ በቀን ከ350 እስከ 400 ለሚደርሱ ሰዎች ነጻ የሕክምና ድጋፍ ለማድረግ አቅደዋል፡፡ ይህን የሕክምና ድጋፍ ለመስጠት ዐሥራ አምስት የሕክምና ባለሙያዎች መጥተዋል ብለዋል፡፡ ከዚህ በተጨማሪም፣ ለሕፃናት አልባሳትና የትምህርት መርጃ መሣሪያዎች እየተለገሰ መሆኑን ለማወቅ ተችሏል፡፡

ከጥቅምት 25 እስከ ኅዳር 3 2010 ዓ.ም. በሚቆየው አገልግሎት ይከናወናሉ ከተባሉ ተግባራት መካከል ከጥቅምት 29 እስከ ኅዳር 3፣ ከቀኑ ዘጠኝ ሰዓት ጀምሮ እስከ ምሽቱ 2 ሰዓት የሚቆየውና በመከኒሳ መካነ ኢየሱስ ሴሚናሪየም ቅጥር ግቢ የሚደረገው የወንጌል ስብከት፣ የጸሎትና የዝማሬ አገልግሎት መርሓ ግብር ዐቢዩ እንደ ሆነ ተነገሯል፡፡ ከዚህ በተጨማሪም፣ የጎዳና ላይ የወንጌል ምስክርነት፣ በተመረጡ ቦታዎች ላይ ሰርከስ፣ መንፈሳዊ ድራማና ሌሎች ጥበባዊ ሥራዎች ይቀርባሉም ተብሏል፡፡

Latest News

SIGN UP FOR OUR NEWSLETTER.

Hintset’s latest news and articles of the week to encourage, challenge, and inform you.