[the_ad_group id=”107″]

የ“ማኒ” ምክክር ጕባኤ ተካሄደ

March 11, 2016
የ“ማኒ” ምክክር ጕባኤ ተካሄደ

“Movement of African National Initiative – MANI” የተሰኘው አህጉር አቀፍ ጥምረት “የእግዚአብሔርን ድምፅ እንዲህ ባሉ ጊዜያት መስማት እና መታዘዝ” በሚል መሪ ቃል፣ ከየካቲት 28 እስከ መጋቢት 2 ቀን 2008 ዓ.ም. በአፍሪካ ኅብረት መሰብሰቢያ አደራሽ ተካሄደ፡፡ በጕባኤው ላይ ከአፍሪካ እና ከተቀረው ዓለም 55 አገራትን ወክለው የመጡና ቁጥራቸው 560 የሚደርሱ የአብያተ ክርስቲያናት እና የአጋር አገልግሎቶች መሪዎች ተገኝተውበታል፡፡

በምክክር ጕባኤው መክፈቻ ሥነ ሥርዐት ላይ ንግግር ያደረጉት የኢትዮጵያ ወንጌላውያን አብያተ ክርስቲያናት ኅብረት ፕሬዚዳንት መጋቢ ጻድቁ አብዶ እንዳሉት፣ አንድ መቶ ሚሊዮን እንደሚደርስ ከሚገመቱት የኢትዮጵያ ብሔር፣ ብሔረሰቦችና ሕዝቦች መካከል፣ ሃያ አምስት የሚያህሉት ወንጌል ያልደረሳቸው መሆናቸውን ገልጸው፣ “የኢትዮጵያ አብያተ ክርስቲያናት እና አጋር አገልግሎቶች እነዚህን ወገኖች ለመደረስ ጥረት በማድረግ ላይ እንዳለ” ጠቁመዋል፡፡ አያይዘውም፣ በአፍሪካ ደረጃ በተመሳሳይ በወንጌል ያልተደረሱ ወገኖች ቁጥር ከፍተኛ መሆኑ ቤተ ክርስቲያን ከፊቷ የሚጠብቃት ትልቅ ሥራ ይህን መሰሉ የምክክር ጕባኤ እንዲደረግ እንደሚያስገደድ ተናግረዋል፡፡

በምክክር ጕባኤው ማብቂያ ላይ የወጣው የአቋም መግለጫ እንደሚያመለክተው እግዚአብሔር ለአፍሪካ ቤተ ክርስቲያን እየተናገራት ካሉ መልእክቶች መካከል፣ ቤተ ክርስቲያን የሚሲዮን አገልግሎቷን በቁርጠኝነት መወጣት እናዳለባት የሚያሳስብ ሲሆን፣ በአንጻሩ በርካታ አብያተ ክርስቲያናት የወንጌል ተልእኳቸውን በሚያዘናጉ ጕዳዮች መተብተባቸውን አመልክቷል፡፡ አያይዞም፣ አክራሪ የእምነት እንቅስቃሴ፣ ሉል-ዓቀፋዊነት እና ስደት ለቤተ ክርስቲያን የተጋረጡ ፈተናዎች መሆናቸውን ይኸው መግለጫ አመልክቷል፡፡

በመሆኑም፣ ቤተ ክርስቲያን ልዩ ትኩረት ሰጥታ ልትሠራባቸው ይገባል ተብለው የተለዩ ጕዳዮችም፣ ወንጌልን ወዳልደረሰባቸውና ወደተዳከመባቸው ሥፍራዎች መውሰድ፣ እውነተኛ ደቀ መዛሙርትን ማፍራት፣ ተተኪ ወጣት መሪዎችን ማብቃት፣ የሴቶችን ሙሉ ተሳትፎ የሚያረጋግጥ ምቹ የአገልግሎት ድባብን መፍጠር እና ቤተ ክርስቲያን እውነተኛውን ወንጌልን በመስበኳ ምክንያት ለሚመጣባት ስደትና መከራ ዝግጁ እንድትሆን ማብቃት የሚሉት ይገኙባቸዋል፡፡ በተጨማሪም፣ የብዙኀን መገናኛን ለወንጌል አገልግሎት ጥቅም ላይ ማዋል፣ በዚህም ረገድ ወጣቶችን ማሳተፍ፣ ለልጆች አገልግሎት ተገቢውን ትኩረት መስጠት፣ ብርቱ የሆነ ጸሎትና ምልጃ ያለማቋረጥ ማካሄድ እንዲሁም ወንጌል ያልደረሳቸውን ሕዝቦች ባህልና ቋንቋ ማጥናት በሚሉት ነጥቦች ላይ አቋም በመያዝ ተጠናቅቋል፡፡

“Movement of African National Initiative – MANI” (“ማኒ”) ከዛሬ ዐሥራ አምስት ዓመት በፊት ሲመሠረት በአፍሪካ ያለቸው የክርስቶስ አካል ታላቁን ተልእኮን ከግብ ማድረስ የሚያስችላትን ንቅናቄ ለመፍጠር በሚል ታስቦ የተቋቋመ ጥምረት (Network) ነው፡፡ ይህ በየአምስት ዓመቱ የሚካሄደው የምክክር ጕባኤ በአዲስ አበባ ሲደረግ ለአራተኛ ጊዜ ሲሆን፣ እ.አ.አ. በ2001 በኢየሩሳሌም የመጀመሪያው ጕባኤ ከተካሄደ በኋላ በ2006 በኬኒያ ዋና ከተማ ናይሮቢ፣ ከዚያም በ20011 አቡጃ፣ ናይጄሪያ ላይ ነበር የተከናወነው፡፡

Latest News

SIGN UP FOR OUR NEWSLETTER.

Hintset’s latest news and articles of the week to encourage, challenge, and inform you.