[the_ad_group id=”107″]

መጋቢ ጻድቁ ለልደት በዓል ቡራኬ ሰጡ

January 6, 2016
መጋቢ ጻድቁ ለልደት በዓል ቡራኬ ሰጡ

አዲሱ የኢትዮጵያ ወንጌላውያን አብያተ ክርስቲያናት ኅብረት ፕሬዚደንት መጋቢ ጻድቁ አብዶ የነገውን የገና በዓል በማስመልከት የክርስቲያን ሚዲያ አካላትን በጽሕፈት ቤታቸው በመጥራት መልእክት አስተላልፈዋል፤ ቡራኬም አድርገዋል፡፡

መጋቢ ጻድቁ እንዳሉት “የጌታችን እና የመድኃኒታችን የኢየሱስ ክርስቶስ ወደዚህ ዓለም በሥጋ መምጣት እግዚአብሔር አምላክ ለሰው ዘር የገባው ተስፋ ፍጻሜ ነው፡፡” በዘፍጥረት 3፥15 ላይ ሰው በኤደን ገነት በኀጢአት ከወደቀ በኋላ የተሰጠው ፍርድ ብቻ ሳይሆን ተስፋም መሆኑን ጠቅሰው፣ “የክርስቶስ ወደ ምድር መምጣት ሕዝቡ ከወደቀበት የኀጢአት ጨለማ በማውጣት ብርሃንን ሊያጎናጽፈንና የሞትን ጥላ ሊገፍልን እንደ ሆነ የነቢዩ ኢሳያስ ትንቢት ያሳውቀናል፡፡” ብለዋል፡፡

በቅርቡ በአየር ንብረት መዛባት ምክንያት በተከሰተ ደርቅ በብዙ ሚሊዮን የሚቈጠሩ ወገኖቻችን ለርኻብ አደጋ መዳረጋቸውን ያስታወሱት መጋቢው፣ ምእመናን ከጌታ የተማሩትን የርኅራኄ ባሕርይ በዚህ አጋጣሚ ችግር ላይ ለወደቁ ወገኖቻችን ማሳየት እንደሚጠበቅባቸው ማሳሰቢያ ሰጥተዋል፡፡ “በወገኖቻችን ላይ የመጣውን የርኻብ አደጋ ለመግታት በወገኖቻችን እግር ገብተን ሥቃዮቻቸውን መካፈልና ሕመማቸውን መታመም መንፈሳዊ ግዴታችን መሆኑን በዚህ አጋጣሚ ማስታወስ እወዳለሁ፡፡” ብለዋል፡፡ “በተለይ ይህንን የልደት በዓል በምናከብርበት ወቅት በብዙ ሚሊዮን የሚቈጠሩ ወገኖቻችን በርኻብ አደጋ ውስጥ መውደቃቸው የታወቀ ነው፡፡ ስለዚህም በዓል ስናደርግ፣ እኛ ስንደሰት በሐዘን ውስጥ ያሉ፣ በጨለማ ውስጥ ያሉ፣ በጭንቀት ውስጥ ያሉ መኖራቸውን ዐስበን የእነሱ ደስታ ሙሉ እንዲሆን ከእኛ ደስታ ቀንሰን አስፈላጊውን ሁሉ ማድረግ ይገባናል፡፡” ሲሉ ምክራቸውን ሰጥተዋል፡፡

“የክርስቶስ ወደ ምድር መምጣት በመጽሐፍ ቅዱሳችን አንደምታው ብዙ ነው” ያሉት መጋቢ ጻድቁ፣ ከብዙው አንድምታ መካከል ሰላም ግንባር ቀደም መሆኑን ጠቁመው፣ በክርስቶስ ወደ ምድር መምጣት ምክንያት በሰውና በእግዚአብሔር፣ በሰው እና በሰው እንዲሁም ሰው ከራሱ ጋር ሰላም እንዲፈጥር ማስቻሉን ገልጸዋል፡፡ “በአገራችንም ሆነ በመላው ዓለም” ላለው የሰላም ችግር መፍትሔ እንዲመጣ ከምእመናን ብርቱ ጸሎት እንደሚጠበቅ እንዲሁም አማኞች በሚቻላቸው ሁሉ ለሰላም አበክረው እንዲሠሩ አሳስበዋል፡፡ በመጨረሻም፣ በመላው ዓለም ተበትነው ላሉ ኢትዮጵያን በሙሉ በዓሉ የሰላም እና የፍስሐ እንዲሆን በመመኘት ቡራኬያቸውን ሰጥተዋል፡፡

Latest News

SIGN UP FOR OUR NEWSLETTER.

Hintset’s latest news and articles of the week to encourage, challenge, and inform you.