[the_ad_group id=”107″]

የኅብረቱ መሪዎች “ብዥታ ለማጥራት” በሚል መግለጫ ሰጡ

November 5, 2018
የኅብረቱ መሪዎች “ብዥታ ለማጥራት” በሚል መግለጫ ሰጡ

ኅብረቱ “የእረኝነት አገልግሎት ለመስጠት በሚል በተለየ arrangement [አግባብ] እንዳቀፋቸው” በሚዲያ መገለጹን ተከትሎ “በቤተ እምነቶቻችንና በአንዳንድ አባሎቻችን ላይ የሄድንበት መንገድ ትንሽ ብዥታ የፈጠረ ስለመሰለን እሱን በተጨማሪ ለማስረዳት” መግለጫውን መስጠት አስፈልጓል ሲሉ መጋቢ ዘሪሁን ደጉ ተናግረዋል።

በዚህም መሠረት “አጋር አባል” የተባለው ቤተ እምነቶቹንና የሚመሯቸውን ግለ ሰቦች በኅብረቱ የእረኝነት አገልግሎት ሥር እንዲሆኑ ለማድረግ በሚል የተዘጋጀ የግንኙነት ሂደት እንደ ሆነ ነው መሪዎቹ ያስረዱት። ለዚህም ቤተ እምነቶቹ ኅብረቱ ባስቀመጠው አቅጣጫ ለመሄድ ፈቃደኛ ሆነው በመገኘታቸው በአጋር አባልነት እንደተቀበሏቸውና ከስድስት ወር በኋላም ለስምምነቱ ተገዥ መሆናቸው እንደሚፈትሽ መጋቢ ዘሪሁን አስረድተዋል።

በአራቱ ቤተ እምነቶች መካከል ያለውን ግንኙነት የጀመረው ኅብረቱ አለመሆኑን የተናገሩት የቦርዱ ጸሐፊ አቶ ቴዎድሮስ በየነ፣ በኅብረቱ የእረኝነት ክትትል ሥር ለመሆን ጥያቄ ያቀረቡት የቤተ እምነቶቹ መሪዎች መሆናቸውን ገልጸዋል። “አጋር አባል” የሚለው ስያሜም ይህንኑ የእረኝነት ክትትል ለመግለጽ በመሆኑ በዚሁ ዐውድ ይታይ ሲሉ ጥሪ አቅርበዋል።

‘የንስሓ ፍሬአቸውን ሳታዩ ለምን ተቀበላችኋቸው?’ በሚል ከጋዜጠኞች ለተነሣው ጥያቄ ምላሽ የሰጡት መጋቢ ዘሪሁን፣ “የንስሓ ፍሬአቸውን ዐይተን ነው አላልንም፤ ወደ ንስሓ እንዲመጡ፣ እነሱን ለማቅረብና ለመደገፍ” በሚል እንደ ሆነ ገልጸዋል። እንደ ቦርዱ ሰብሳቢ ገለጻ ከሆነ ዐሥራ ሦስት ነጥቦች የያዘውን የመግባቢያ ሠነድ የፈረሙት ወደ ንስሓ እንዲያመሩ በሚል ነው። “በተባለው ነጥብ ላይ በሙሉ በይፋ ንስሓ ገብተዋል ማለት አይደለም፤ ንስሓ እንዲገቡ ተጨማሪ ሥራ ይሠራል።” ሲሉም አክለዋል።

‘የትኛውንም አባልነት የመቀበል ሥልጣን ያለው የኅብረቱ ጠቅላላ ጉባኤ እንጂ ቦርዱም ሆነ ጽ/ቤቱ አይደለም’ ለሚሉ ሰዎች ያላችሁ ምላሻ ምንድን ነው በሚል ለተነሣው ጥያቄ መጋቢ ዘሪሁን፣ “የአንድ ተቋም ደንብ በሁለት መንገድ ይመነጫል፤ አንደኛው ተቋሙ ሲመሠረት በጋራ የተቀበለውና ያጸደቀው ሠነድ የጋራ ደንብ ሆኖ ያገለግላል። ሁለተኛው፣ በተለያዩ ጊዜያት የሚወጡ፣ ኅብረቱን የመሠረተው አካል ተጨማሪ ውሳኔ በሚፈልግባቸው ጉዳዮች ላይ ተስማምቶ አቋም በሚይዝበት ጊዜ እንደ ደንብ ያገለግላል። ከዚህ አንጻር እነዚህን እንድናቅፍ፣ በእረኝነት ሥር እንድናደርጋቸው በቦርድ ወይም በጽ/ቤት የተወሰነ ብቻ ሳይሆን፣ በዚያ በሠነዳችን በአንቀጽ 8 ላይ [32ኛው መደበኛ ጠቅላላ ጉባኤ ያወጣው የአቋም መግለጫ] ጠቅላላ ጉባኤው በግልጽ አስቀምጦታል። ስለዚህ ይሄኛው ማንዴት የሚመነጨው ጠቅላላ ጉባኤው ካጸደቀ ሠነድ ነው።” ሲሉ ተደምጠዋል።

በስም ከተጠቀሱት ቤተ እምነቶች በተጨማሪ በዚህ የመግባቢያ ሠነድ “አጋር አባላት” የሆኑ የሌሎች ቤተ እምነቶች ቁጥር ምን ያህል እንደ ሆነ ጥያቄ የቀረበላቸው መሪዎቹ፣ ትክክለኛውን ቁጥር ሳይናገሩ ቀርተዋል።

የኢትዮጵያ ወንጌላውያን አብያተ ክርስቲያናት ኅብረት አራት ቤተ እምነቶችንና መሪዎቻቸውን “በአጋር አባልነት” መቀበሉ፣ በአማኙ ማኅብረ ሰብ ዘንድ ብርቱ የመነጋገሪያ ርእስ ሆኖ መሰነበቱ ይታወሳል


ተያያዥ ጽሑፎች

Latest News

SIGN UP FOR OUR NEWSLETTER.

Hintset’s latest news and articles of the week to encourage, challenge, and inform you.