[the_ad_group id=”107″]

September 8, 2018

የኢትዮጵያ ቃለ ሕይወት ቤተ ክርስቲያን ወደ ኅብረቱ ልትመለስ ነው፤ መካነ ኢየሱስም ትከተላታለች ተብሏል

የኢትዮጵያ ቃለ ሕይወት ቤተ ክርስቲያን ወደ ኅብረቱ ልትመለስ ነው፤ መካነ ኢየሱስም ትከተላታለች ተብሏል

የኢትዮጵያ ቃለ ሕይወት ቤተ ክርስቲያን ወደ ኢትዮጵያ ወንጌላውያን አብያተ ክርስቲያናት ኅብረት ልትመለስ ነው ተባለ። ጳጉሜ 4 ቀን 2010 ዓ.ም. በኢትዮጵያ ሥነ መለኮት ድኅረ ምረቃ ት/ቤት የመሰብሰቢያ አዳራሽ በተደረ የዕርቅ ጉባኤ ላይ የኅብረቱ እና የኢትዮጵያ ቃለ ሕይወት ቤተ ክርስቲያን መሪዎች እንዲሁም ጥሪ የተደረገላቸው እንግዶች በተገኙበት ዕርቁ ተበስሯል።

የዕርቁን ሂደት ሲሸመግሉ የነበሩ ግለ ሰቦች በዕለቱ እንደተናገሩት፣ አጭር ጊዜ የፈጀው ይህ የዕርቅ ሂደት ያለ መሪዎቹ ቀናነትና ትኅትና የታከለበት ምላሽ እውን ሊሆን እንደማይችል ገልጸው ምስጋናቸውን ለመሪዎቹ አቅርበዋል። በጥቂት ቀናት ውስጥ በተደረገው የማሸማገል ሂደት የተገኘው በጎ ምላሽ ፍጹም አበረታች መሆኑንም ተገልጿል።

የኢትዮጵያ ቃለ ሕይወት ቤተ ክርስቲያን ራሷን ከኅብረቱ እንድታገልል ምክንያት ያደረገቻቸውና በኅብረቱ መተዳደሪያ ደንቡ ላይ የነበሩ አንቀጾች አሁን የሌሉ መሆናቸውን የተናገሩት ደግሞ የኢትዮጵያ ወንጌላውያን አብያተ ክርስቲያናት የቦርድ ሰብሳቢ የሆኑት መጋቢ ዘሪሁን ደጉ ናቸው። መጋቢ ዘሪይሁን እንደተናገሩት፣ ባለፉት ዓመታት የተፈጠረው መለያየት ከሁሉ በላይ እግዚአብሔርን የሚያሳዝን መሆኑን ገልጸው፣ ለዚህም “ይቅርታ እንጠይቃለን” በለዋል። አያይዘውም ‘ቃለ ሕይወት ስታነሣ የነበረችውን ጥያቄ በተገቢው መንገድ መመልስ እንችል ነበር’ ሲሉም ተደምጠዋል። መጋቢ ዘሪሁን በተቋማት ደረጃ መዋቅራዊ ልዩነት ቢኖርም፣ በምእመናን ደረጃ አንድነቱና ኅብረቱ ዘልቆ መቆየቱ የመለያየቱ አስፈላጊነት ላይ ጥያቄ የሚጭር መሆኑንም አብራርተዋል።

የኢትዮጵያ ቃለ ሕይወት ቤተ ክርስቲያና ዋና ጸሐፊ የሆኑት አቶ ኩርሲ ሸፈኖ ባደረጉት ንግግር፣ ቃለ ሕይወት ቤተ ክርስቲያን ከኅብረቱ ምሥረታ ጀምሮ ለኅብረቱ መጠናከር ብርቱ ጥረት ስታደርግ መቆየታቸውን አስታውሰው፣ ከኅብረቱ ራሳቸውን ያገለሉበትን ምክንያቶችና የወሰዱትን ጥረት በመጠቆም፣ ቤተ ክርስቲያናቸው ከኅብረቱ ራሷን ያገለለችው ተገድዳ መሆኑን አስረድተዋል። በመሆኑም፣ ከሽምግሌዎች የዕርቅ ጥያቄው ሲመጣ፣ በበጎ መቀበላቸውን፣ በቀጣይም የቤተ ክርስቲያኒቱ መዋቅር በሚያዝዘው መሠረት እስከ ጠቅላላ ጉባኤ ድረስ በማቅረብ የዕርቅ ሂደቱን ዳር እንደሚያደርሱት ቃል ገብተዋል። ቤተ ክርስቲያኒቱ ከኅበረቱ ራሷን ለማግለል በጠቅላላ ጉባኤ ያስወሰነችው የካቲት 2004 ዓ.ም. ላይ ነበር።

በተመሳሳይ ዜና የኢትዮጵያ ወንጌላዊት ቤተ ክርስቲያን መካነ ኢየሱስ ራሷን ከለየችበት የኢትዮጵያ ወንጌላውያን አብያተ ክርስቲያናት ኅብረት ለመመለስ ጥረት እየተደረገ መሆኑ ተገለጸ። የቤተ ክርስቲያኒቱ አመራሮችም ለዚሁ ጥረት በጎ ምላሽ ማሳየታቸውን አስታራቂ ሽማግሌዎችን በመወከል አቶ ጌቱ ግዛው ገልጸዋል። አቶ ጌቱ እንደተናገሩት፣ ጉዳዩ የሚመለከተው የቤተ ክርስቲያኒቱ አመራር በዚህ አጭር ጊዜ ውስጥ ሊሰበሰብ ባለመቻሉ እንጂ፣ የቃለ ሕይወት መመለስ በተበሠረበት እሑድ ጳጉሜ 4 ቀን 2010 ዓ.ም. ዕለት የመካነ ኢየሱስ መመለስ ይፋ ይደረግ ነበር ተቧላል።

ሁለቱም ቤተ እምነቶች የኢትዮጵያ ወንጌላውያን አብያተ ክርስቲያናት ኅብረት መሥራች አባላት ሲሆኑ፣ ከአጠቃላዩ የወንጌላውያኑ ማኅበረ ሰብ ከግማሽ በላይ የሚሆነውን እንደሚወክሉ ይታመናል። እነዚህን ቤተ እምነቶች ወደ ኅብረቱ ለመመለስ ጥረት ሲያደርጉ የቆዩትና በማድረግ ላይ የሚገኙት ግለ ሰቦች፣ አቶ ጌቱ ግዛው፣ መጋቢ/ዘማሪ ተስፋዬ ጋቢሶ፣ ዶ/ር ማሙሻ ፈንታ፣ ወ/ሮ ተናኜ ለማ እና አቶ ዘላለም አበበ እና አቶ ፀሓይ ወጣ ታደሰ ናቸው።

Latest News

ለችግረኛ ቤተ ሰቦች የሚሆን የአንድ ወር ቀለብ ሰፈራ ሊደረግ ነው

የኮቪድ – 19 ስርጭትን ለመግታት በሚደረገው የሥራና የእንቅስቃሴ ገደብ ምክንያት፣ የከፋ ጉዳት ሊደርስባቸው ይችላሉ ተብለው ለሚታሰቡ የኅብረተ ሰብ ክፍሎች ለአንድ ወር ቀለብ የሚሆን ድጋፍ ለማሰባሰብ የሚያስችል ቅስቀሳ ተጀመረ።

Read More »
SIGN UP FOR OUR NEWSLETTER.

Hintset’s latest news and articles of the week to encourage, challenge, and inform you.