[the_ad_group id=”107″]

መንግሥት ለሃይማኖት ትምህርት ተቋማት ዕውቅና ሊሰጥ እንደሚገባ ተጠቆመ

November 30, 2018
መንግሥት ለሃይማኖት ትምህርት ተቋማት ዕውቅና ሊሰጥ እንደሚገባ ተጠቆመ

የኢትዮጵያ ሥነ መለኮት ድኅረ ምረቃ ት/ቤት የሃይማኖት ትምህርት ተቋማት በመንግሥት ዕውቅና እንዲሰጣቸው ማድረግ በሚቻልበት ሁኔታ ላይ የሚመክር ዐውደ ጥናት ኅዳር 21 ቀን፣ 2011 ዓ.ም. በትምህርት ቤቱ መሰብሰቢያ አዳራሽ አካሄደ።

ሙሉ ቀን በፈጀው ዐውደ ጥናት ላይ ሦስት ወረቀቶች የቀረቡ ሲሆን፣ ‘የአገሪቱ ሕግ መንግሥት የሃይማኖት ትምህርት ተቋማት በመንግሥት ዕውቅና እንዳይሰጣቸው ይከለክላል’ የሚባለው፣ ጠንካራ መሠረት እንደ ሌለው ዶ/ር ፋሲል ናሆም አስረድተዋል። ሕገ መንግሥቱን በማርቀቁ ሂደት እንደተሳተፉ የሚነገርላቸው ዶ/ር ፋሲል ባቀረቡት ወረቀት ላይ እንዳብራሩት ከሆነ፣ ችግሩ ያለው ሕጉን በመተርጎምና መመሪያ በማውጣት ሂደት ላይ ነው። ስለሆነም፣ የሃይማኖት የትምህርት ተቋማት በመንግሥት ተገቢው ዕውቅና ሊሰጣቸው እንደሚገባ ጠቁመዋል።

ሌላኛው ወረቀት አቅራቢ ዶ/ር ደስታ ሄሊሶ በበኩላቸው፣ የሃይማኖት የትምህርት ተቋማት በመንግሥት ዕውቅና ቢሰጣቸው መንግሥትም ሆነ ትምህርት ቤቶቹ ሊያገኙ ስለሚችሉት ጥቅሞች ከሌሎች አገሮች ተመክሮን በመውሰድ አስረድተዋል። በኢትዮጵያ ሁኔታ ሃይማኖት በአጠቃላይ ኅብረተ ሰቡ ላይ ያለው ተጽእኖ በጣም ከፍተኛ ነው፤ ይህ መሆኑ እየታወቀ የሃይማኖት ትምህርት ተቋማት በመንግሥት ዕውቅና እንዳይሰጣቸው መደረጉ በአገር ሰላምም ሆነ ልማት ላይ ተቋማቱ ሊጫወቱት የሚችሉትን ጉልሕ ሚና የሚያሳንስ እንደ ሆነ አስረድተዋል።

በተመሳሳይ ዶ/ር ልደቱ ዓለሙ፣ በአሁኑ ጊዜ በዓለም አቀፍ ደረጃ ተፈላጊነቱ እየጨመረ መጥቷል ያሉትንና የተለያዩ የሙያ ዘርፎችን በአንድ እያሰናሰሉ ማጣናት (Interdisciplinary studies) ያለውን ጠቀሜታ አስረድተዋል። አያይዘውም፣ በእኛም አገር የሥነ መለኮት ተቋማት በመንግሥት ዕውቅና ተሰጥቷቸው ከሌሎች የሙያ ዘርፎች ጋር ቢጠኑ ለአገር ሊያበረክቱ የሚችሉት አስተዋጽዖ ከፍተኛ እንደሚሆን አብራርተዋል።

በዐውደ ጥናቱ ላይ የተገኙት የሥነ መለኮት ተቋማት መሪዎች ተቋሞቻቸው በመንግሥት ዕውቅና ቢሰጣቸው ሊገኝ የሚችለውን ጥቅም፣ በአንጻሩም ሊያሳጣቸው በሚችላቸው ነጥቦች ላይ ያላቸውን ሐሳቦች ሰንዝረዋል። በተለይ፣ መንግሥት ዕውቅና እንዲሰጣቸው ሲደረግ በሥርዐተ ትምህርቱ ላይም ሆነ በተማሪዎች ቅበላ ያላቸውን ነጻነት ሊጋፋ ይችላል የሚል ሥጋት በተሳታፊዎች ተነሥቷል።

በመጨረሻም፣ ጉዳዩን በዝርዝር የሚመለከት ጥናት ተደርጎ ሰፊ ውይይት እንዲካሄድና ሌሎች ባለ ድርሻ አካላት እንዲሳተፉበት ሐሳብ ተሰጥቷል። ለዚህም የኢትዮጵያ ወንጌላውያን ሥነ መለኮት ተቋማት ማኅበርና የኢትዮጵያ ሥነ መለኮት ድኅረ ምረቃ ት/ቤት ኀላፊነቱን እንዲወስዱ ስምምነት ላይ ተደርሶ ዐውደ ጥናቱ ተጠናቅቋል።

Latest News

SIGN UP FOR OUR NEWSLETTER.

Hintset’s latest news and articles of the week to encourage, challenge, and inform you.